इस्रायल-इराण संघर्षामुळे पाकिस्तानची चिंता वाढली; पाक-इराण सीमावर्ती भागात अतिरेकी गट सक्रिय होण्याची भीती

विशेष प्रतिनिधी

इस्लामाबाद : इस्रायल आणि इराण यांच्यातील संघर्ष तीव्र होत असतानाच पाकिस्तानने देखील आपली चिंता व्यक्त केली आहे. पाकिस्तानच्या लष्करप्रमुख फील्ड मार्शल असीम मुनीर आणि अमेरिकेचे माजी राष्ट्राध्यक्ष डोनाल्ड ट्रम्प यांच्यात बुधवारी झालेल्या बैठकीत, पाकिस्तानने इराणच्या सीमेवर असलेल्या देशविघातक आणि जिहादी गटांविषयी चिंता व्यक्त केली.

इराण आणि पाकिस्तान दरम्यान सुमारे ९०० किलोमीटरची सीमा आहे. या सीमावर्ती भागात दोन्ही देशविरोधी अतिरेकी गट सक्रिय असल्याची माहिती समोर आली आहे. इस्रायलच्या लष्करी मोहिमेत इराण सरकार पाडण्याच्या उद्देशाचे संकेत दिले गेले असून त्यामुळे पाकिस्तानमध्ये अस्थिरता वाढण्याची शक्यता व्यक्त केली जात आहे.

पाकिस्तानने इस्रायलच्या इराणवरील हल्ल्याचा तीव्र निषेध करत त्याला आंतरराष्ट्रीय कायद्याचा भंग असल्याचे म्हटले आहे. दरम्यान, पाकमधून कार्यरत असलेला बलुच सुन्नी मुस्लिमांचा गट ‘जैश अल अदल’ (Jaish al-Adl) याने १३ जून रोजी प्रसिद्ध केलेल्या निवेदनात म्हटले की, “इराणशी सुरू असलेला इस्रायलचा संघर्ष आमच्यासाठी मोठी संधी आहे. आम्ही इराणमधील जनतेला आणि विशेषतः बलुचिस्तानमधील जनतेला आणि लष्कराला आमच्या प्रतिकार चळवळीत सहभागी होण्याचे आवाहन करतो.”

या पार्श्वभूमीवर पाकिस्तानमध्येही अशी भीती आहे की, इराणमध्ये लपलेले पाकिस्तानी बलुच फुटीरतावादी गट पुन्हा हल्ल्यांची मालिकाच सुरू करतील. पाकिस्तानचे माजी अमेरिकन राजदूत मलीहा लोधी यांनी सांगितले की, “सीमेवरची अनियंत्रित जागा ही अतिरेकी गटांसाठी सुपीक जमीन ठरू शकते.”

अजित पवार आणि संजय शिरसाट यांच्यात समेट; निधी वाटपावरून निर्माण झालेला वाद मिटला

इस्लामाबादस्थित विश्लेषक सिंबल खान यांच्या मते, “बलुच गट एका मोठ्या ‘ग्रेटर बलुचिस्तान’ आंदोलनाच्या दिशेने वाटचाल करू शकतात. पाकिस्तान आणि इराणमधील बलुच बहुल भाग वेगळे करून नवीन देश तयार करण्याचा प्रयत्न होऊ शकेल. .जर हे सर्व पेटलं, तर हे सर्व गट एकत्र लढायला सज्ज होतील.”

याशिवाय, पाकिस्तानला इस्रायलने इराणच्या अणुस्थळांवर केलेल्या हल्ल्याचा धोरणात्मक संदर्भही खटकत आहे. विशेषतः भारत आणि पाकिस्तानदरम्यान काही आठवड्यांपूर्वीच जम्मू-काश्मीरमधील पहलगाम दहशतवादी हल्ल्यानंतर चार दिवसांपर्यंत संघर्ष झाला होता. या पार्श्वभूमीवर इस्रायलने दिलेला संदेश खूप काही सूचक असल्याचे पाकिस्तानला वाटते.

असीम मुनीर यांच्यासोबतच्या बैठकीनंतर ट्रम्प यांनी सांगितले, “पाकिस्तान सध्या घडणाऱ्या कोणत्याच गोष्टींवर समाधानी नाही.”

पाकिस्तानच्या लष्कराने गुरुवारी सांगितले की, त्यांनी अमेरिका प्रतिनिधींशी इराणबाबत चर्चा केली असून दोन्ही देशांनी या संघर्षावर तोडगा निघणे आवश्यक असल्याचे मान्य केले आहे.

पाकिस्तानच्या परराष्ट्र मंत्रालयाचे प्रवक्ते शफकत अली खान म्हणाले, “इराणमध्ये जे काही सुरू आहे, ते आमच्यासाठी खूप गंभीर आहे. ही परिस्थिती संपूर्ण प्रादेशिक सुरक्षेला धक्का पोहोचवू शकते. इराणच्या अस्थिरतेचा थेट परिणाम आमच्यावर होतो.”ताज्या घडामोडी लक्षात घेता पाकिस्तानने सीमावर्ती भागात सुरक्षा वाढवली आहे.

इस्रायल-इराण संघर्षामुळे पाकिस्तानची चिंता वाढली; पाक-इराण सीमावर्ती भागात अतिरेकी गट सक्रिय होण्याची भीती