विशेष प्रतिनिधी
मुंबई : महाराष्ट्र राज्य मार्ग परिवहन महामंडळातर्फे सार्वजनिक वाहतूक अधिक आकर्षक आणि लोकाभिमुख करण्याच्या उद्देशाने अभिनेता रितेश देशमुख आणि अभिनेत्री जिनेलिया देशमुख यांची ब्रॅण्ड अॅम्बेसिडर म्हणून निवड करण्यात आली आहे. एसटीची प्रतिमा अधिक आधुनिक बनवणे आणि नव्या पिढीला या सेवेकडे आकर्षित करणे, हा या निर्णयामागील मुख्य हेतू आहे. ग्रामीण भागापासून शहरांपर्यंत एसटीची पोहोच वाढवण्यासाठी या सेलिब्रिटी जोडीचा वापर केला जाणार आहे. Riteish and Genelia Deshmukh
सार्वजनिक वाहतुकीचा वापर वाढवण्यासाठी केवळ सुविधा वाढवणे पुरेसे नसते, तर लोकांपर्यंत पोहोचण्यासाठी प्रभावी प्रतिमा निर्माण करणेही तितकेच महत्त्वाचे असते. याच विचारातून रितेश आणि जिनेलिया यांची निवड करण्यात आली आहे. त्यांच्या लोकप्रियतेचा फायदा घेत एसटी महामंडळ प्रवाशांमध्ये सकारात्मक संदेश पोहोचवण्याचा प्रयत्न करणार आहे.
परिवहन मंत्री प्रताप सरनाईक लवकरच या दोघांसोबत अधिकृत करार करणार आहेत. हा करार पाच वर्षांसाठी असणार असून, या कालावधीत दोघेही विविध जाहिराती, मोहिमा आणि सामाजिक उपक्रमांमध्ये सहभागी होणार आहेत. एसटीच्या सेवांबाबत जनजागृती निर्माण करण्यासाठी तसेच प्रवाशांना सार्वजनिक वाहतुकीचा पर्याय स्वीकारण्यासाठी प्रोत्साहन देण्यासाठी या दोघांची भूमिका महत्त्वाची ठरणार आहे.
याआधीही एसटी महामंडळाने मराठी चित्रपटसृष्टीतील प्रसिद्ध कलाकारांना ब्रॅण्ड अॅम्बेसिडर म्हणून निवडले होते. मकरंद अनासपुरे आणि दिवंगत विक्रम गोखले यांनी ही जबाबदारी पार पाडली होती. त्यांच्या माध्यमातून एसटीला एक वेगळी ओळख मिळाली होती. आता त्याच परंपरेला पुढे नेत नव्या पिढीशी जोड निर्माण करण्याचा प्रयत्न केला जात आहे.
Riteish and Genelia Deshmukh to be ST’s brand ambassadors
महत्वाच्या बातम्या
