विशेष प्रतिनिधी
मुंबई : Sandeep Deshpande : स्थानिक स्वराज्य संस्थांच्या निवडणुका जवळ येत असल्याने राज्यातील राजकीय वातावरण तापायला सुरुवात झाली आहे. भारतातील सर्वात श्रीमंत महानगरपालिकांपैकी एक असलेल्या मुंबई महानगरपालिकेवर आपलाच महापौर बसेल, अशी वक्तव्ये सर्व राजकीय पक्ष करताना दिसत आहेत. याच पार्श्वभूमीवर, महाराष्ट्र नवनिर्माण सेनेचे (मनसे) नेते संदीप देशपांडे यांनी मुंबई महानगरपालिकेवर मनसेचा महापौर बसेल, असा विश्वास व्यक्त केला आहे.
मुंबई महानगरपालिकेवर आपला झेंडा फडकवण्यासाठी सत्ताधारी आणि विरोधी पक्षांकडून मोर्चेबांधणीला सुरुवात झाली आहे. भारतीय जनता पक्षाने (भाजप) मुंबईत मेळावा घेऊन मुंबई महानगरपालिकेवर भाजपचाच महापौर बसेल, असा विश्वास व्यक्त केला आहे. शिंदे गटाच्या शिवसेनेच्या कार्यकर्ता मेळाव्यातही ‘मुंबई महानगरपालिकेवर भगवा झेंडा फडकेल आणि शिवसेनेचाच महापौर असेल,’ अशा आशयाची पोस्टर लावण्यात आली होती. ठाकरे गटाच्या शिवसेनेकडूनही काही दिवसांपूर्वी खासदार संजय राऊत यांनी ‘मुंबई महानगरपालिकेवर शिवसेनेचाच महापौर असेल,’ असे वक्तव्य केले होते. यात आता मनसेचे संदीप देशपांडे यांच्या वक्तव्याची भर पडली आहे.
महाराष्ट्रात स्वतःचे अस्तित्व टिकवण्यासाठी झगडणाऱ्या महाराष्ट्र नवनिर्माण सेनेला मुंबई महानगरपालिकेवर आपला महापौर बसवण्याचा विश्वास संदीप देशपांडे यांनी व्यक्त केला आहे. मनसे आणि ठाकरे गटाच्या शिवसेनेत मुंबई महानगरपालिकेच्या निवडणुकीसाठी युती होणार असल्याची चर्चा गेल्या काही दिवसांपासून सुरू आहे. मात्र, या युतीबाबत कोणताही ठोस निर्णय झालेला दिसत नाही.
मुंबई महानगरपालिकेच्या निवडणुकीसाठी सर्व राजकीय पक्षांनी कंबर कसली आहे. भाजपाने आक्रमक नेते अमित साठम यांच्यावर मुंबई शहराध्यक्षपदाची जबाबदारी सोपवली आहे. भाजपचे नवे प्रदेशाध्यक्ष रवींद्र चव्हाण यांनीही मुंबई महानगरपालिकेवर भाजपचा महापौर बसवण्याचा निर्धार व्यक्त केला आहे. मुख्यमंत्री देवेंद्र फडणवीस यांचेही मुंबई महानगरपालिकेवर विशेष लक्ष आहे. शिंदे गटाच्या शिवसेनेकडूनही मुंबई महानगरपालिकेसाठी जोरदार तयारी सुरू आहे. ठाकरे गटाच्या शिवसेनेकडून आणि आता मनसेकडूनही आगामी निवडणुकीसाठी हालचाली सुरू झाल्या आहेत. मात्र, मनसे आणि ठाकरे गटाच्या शिवसेनेतील युतीबाबत कोणताही ठोस निर्णय न झाल्याने दोन्ही पक्षांचे कार्यकर्ते संभ्रमात असल्याचे दिसत आहे.
दरम्यान, संदीप देशपांडे यांच्या या वक्तव्यावर शिवसेना (ठाकरे गट) नेत्या आणि माजी महापौर किशोरी पेडणेकर यांनी प्रतिक्रिया दिली. त्या म्हणाल्या, “मनसे आणि शिवसेना (ठाकरे गट) एकत्र लढणार आहेत. अशा वेळी आपल्या कार्यकर्त्यांमध्ये उत्साह निर्माण करण्यासाठी आणि त्यांना जिद्दीने लढण्यास तयार करण्यासाठी प्रत्येक पक्षाचा नेता असा विश्वास व्यक्त करत असतो.”
The mayor of Mumbai will be a Marathi and he will be from MNS; Sandeep Deshpande believes
महत्वाच्या बातम्या
- Devendra Fadnavis गतिमान आणि प्रगतीशील कायदा-सुव्यवस्था उभी करणार! अमित शहा यांच्यासोबत देवेंद्र फडणवीस यांची बैठक
- Russia : ”रशियाने युक्रेनमधील चेर्नोबिल पॉवर प्लांटवर हल्ला केला”
- PM Modi : पंतप्रधान मोदींच्या दौऱ्यामुळे भारत-अमेरिका व्यापार संबंध अधिक मजबूत
- Manipur : मणिपूरमधील कॅम्पमध्ये सीआरपीएफ जवानाने केला गोळीबार अन् नंतर…
