विशेष प्रतिनिधी
नवी दिल्ली : Jantar Mantar कॉक्रोच जनता पार्टीच्या आंदोलनादरम्यान जंतर-मंतर परिसरात बुधवारी रात्री पुन्हा एकदा तणाव निर्माण झाला. आंदोलक आणि दिल्ली पोलीस आमनेसामने आल्यानंतर झालेल्या संघर्षात दोन सहाय्यक पोलीस आयुक्त, दोन पोलीस निरीक्षक आणि अन्य पोलीस कर्मचाऱ्यांसह किमान पाच जण जखमी झाल्याची माहिती पोलिसांनी दिली आहे. परिस्थिती नियंत्रणात आणण्यासाठी पोलिसांनी अश्रूधुराच्या नळकांड्यांचा वापर केला असून परिसरात निमलष्करी दलाचा अतिरिक्त बंदोबस्त तैनात करण्यात आला आहे.Jantar Mantar
कॉक्रोच जनता पार्टीचे प्रमुख अभिजीत दीपके यांच्या आवाहनानंतर देशभरातील तरुणांनी 20 जुलै रोजी विविध मागण्यांसाठी संसदेच्या दिशेने मोर्चा काढला होता. मात्र आंदोलकांना संसद भवनाच्या दिशेने जाण्यापासून रोखण्यासाठी पोलिसांनी बॅरिकेडिंग करत मोर्चा अडवला. यावेळी पोलीस आणि आंदोलकांमध्ये झटापट झाली. आंदोलकांना पांगवण्यासाठी पोलिसांनी लाठीचार्ज आणि अश्रूधुराचा वापर केल्याचा आरोप करण्यात आला होता. या कारवाईत अनेक आंदोलक आणि काही पोलीस कर्मचारी जखमी झाले होते.
संसदेच्या दिशेने निघालेला मोर्चा रोखल्यानंतर कॉक्रोच जनता पार्टीच्या कार्यकर्त्यांनी त्याच दिवशी रात्री जंतर-मंतरवर आंदोलन सुरू केले. सलग दोन दिवस आंदोलन तुलनेने शांततेत सुरू होते. मात्र 22 जुलै रोजी रात्री नऊच्या सुमारास आंदोलक आणि पोलिसांमध्ये पुन्हा वाद निर्माण झाला. काही वेळातच या वादाचे रूपांतर धक्काबुक्की आणि संघर्षात झाल्याचे समोर आले.Jantar Mantar
घटनेचे काही व्हिडीओ सोशल मीडियावर समोर आले असून त्यामध्ये आंदोलक आणि पोलीस एकमेकांसमोर उभे असल्याचे तसेच काही ठिकाणी दगडफेक होत असल्याचे दिसून येते. दगडफेकीनंतर पोलिसांनी आंदोलकांना मागे हटवण्याचा प्रयत्न केला. यावेळी परिसरात मोठा गोंधळ निर्माण झाला आणि आंदोलकांची पळापळ झाली.
दिल्ली पोलिसांनी केलेल्या दाव्यानुसार, आंदोलनात सहभागी झालेल्या काही व्यक्तींनी तलवारी आणि खुकरीसारखी शस्त्रे हवेत फिरवली. या प्रकारामुळे पोलिसांना परिस्थिती नियंत्रणात आणण्यासाठी अतिरिक्त बळाचा वापर करावा लागल्याचे सांगण्यात आले. मात्र आंदोलकांकडून या आरोपांबाबत अद्याप अधिकृत प्रतिक्रिया देण्यात आलेली नाही.
संघर्षात जखमी झालेल्यांमध्ये दोन सहाय्यक पोलीस आयुक्त, दोन पोलीस निरीक्षक आणि अन्य पोलीस कर्मचाऱ्यांचा समावेश असल्याचे पोलिसांनी स्पष्ट केले. जखमींना उपचारासाठी रुग्णालयात दाखल करण्यात आले असून त्यांच्या प्रकृतीबाबत अधिकृत माहिती अद्याप समोर आलेली नाही. आंदोलकांपैकी कोणी जखमी झाले आहे का, याबाबतही स्पष्ट माहिती उपलब्ध झालेली नाही.
घटनेनंतर जंतर-मंतर आणि संसद मार्ग परिसरातील सुरक्षा व्यवस्था वाढवण्यात आली आहे. संसद मार्गाकडे जाणारा रस्ता बंद करण्यात आला असून महत्त्वाच्या ठिकाणी बॅरिकेड्स लावण्यात आले आहेत. परिसरात दिल्ली पोलिसांसह निमलष्करी दलाचे जवान तैनात करण्यात आले असून प्रत्येक हालचालीवर बारकाईने लक्ष ठेवले जात आहे.
पोलिसांकडून परिसरातील सीसीटीव्ही फुटेज आणि सोशल मीडियावर प्रसारित झालेले व्हिडीओ तपासले जात आहेत. दगडफेक आणि शस्त्रे दाखवणाऱ्या व्यक्तींची ओळख पटवण्याचे प्रयत्न सुरू असल्याची माहिती आहे. हिंसाचारास जबाबदार असलेल्या व्यक्तींविरोधात गुन्हे दाखल करून कारवाई केली जाण्याची शक्यता आहे.
दरम्यान, आंदोलनाचे नेतृत्व करणाऱ्या कॉक्रोच जनता पार्टीकडून या संघर्षाबाबत अद्याप कोणतेही अधिकृत निवेदन जारी करण्यात आलेले नाही. पोलीस कारवाई, दगडफेक आणि शस्त्रांबाबत करण्यात आलेल्या आरोपांवर पक्ष काय भूमिका मांडतो, याकडे आता लक्ष लागले आहे. जंतर-मंतर परिसरातील परिस्थिती सध्या तणावपूर्ण मात्र नियंत्रणात असल्याचे पोलिसांनी सांगितले.
Clashes erupt between Delhi Police and protesters at Jantar Mantar; five injured
महत्वाच्या बातम्या
- Dr Kumar Saptarshi : ज्येष्ठ समाजवादी विचारवंत डॉ. कुमार सप्तर्षी यांचे निधन
- मुख्यमंत्री देवेंद्र फडणवीस यांच्या वाढदिवशी जाहिरात, होर्डिंग, उत्सव नको! पक्षातर्फे आवाहन
- पुण्याची वाहतूककोंडी फोडणार तीन महामार्ग, मुख्यमंत्री देवेंद्र फडणवीस यांची माहिती
- आपलं म्हणणं खरं करणं यालाच हुकूमशाही म्हणतात, उद्धव ठाकरे यांची टीका
