Ashok Kharat : अश्लील व्हिडिओ प्रसारित करणाऱ्यांवर थेट गुन्हे दाखल करणार, ग्रुपच्या अॅडमिनवरही कारवाई

नाशिक : Ashok Kharat भोंदूबाबा अशोक खरात प्रकरणात पोलिसांनी आता अधिक आक्रमक भूमिका घेत अश्लील व्हिडिओ प्रसारित करणाऱ्यांवर थेट गुन्हे दाखल करण्याचा निर्णय घेतला आहे. सोशल मीडियावर मोठ्या प्रमाणात व्हायरल होत असलेल्या या व्हिडिओंमुळे संबंधित महिलांची ओळख उघड होण्याचा धोका निर्माण झाला असून परिस्थिती अत्यंत संवेदनशील बनली आहे. यामुळे पोलिसांनी विलंब न करता कडक कायदेशीर कारवाईची प्रक्रिया सुरू केली आहे.Ashok Kharat

या प्रकरणात अहिल्यानगर जिल्ह्यातील कोपरगाव येथील राहुल शिंदे, योगेश आढाव आणि बीड जिल्ह्यातील संदीप गरजे यांच्याविरुद्ध गुन्हा नोंदवण्यात आला आहे. प्राथमिक तपासात या तिघांमधील व्हिडिओ शेअरिंगची साखळी स्पष्ट झाली आहे. संदीप गरजे याच्याकडून हे व्हिडिओ योगेश आढाव याला मिळाले, तर योगेशने ते पुढे राहुल शिंदेला पाठवले. पोलिसांचा संशय आहे की, ही साखळी यापेक्षा मोठी असू शकते आणि अजून काही जण या प्रकरणात सहभागी असण्याची शक्यता नाकारता येत नाही. त्यामुळे तपासाचा विस्तार करण्यात आला असून डिजिटल पुराव्यांच्या आधारे इतर संशयितांचा शोध घेतला जात आहे.Ashok Kharat

• तालिका सभापती परिस्थिती बघून निर्देश देऊ शकतात, पण ते ब्रह्मवाक्य नाही, मुख्यमंत्र्यांनी केले स्पष्ट

पोलिसांनी भारतीय न्याय संहितेच्या कलम २९४ (२) आणि ३ (५) तसेच माहिती तंत्रज्ञान कायदा २००० अंतर्गत कलम ६७ (अ) नुसार गुन्हे दाखल केले आहेत. या कायद्यांनुसार अश्लील सामग्रीचे प्रसारण करणे, तसेच कोणत्याही व्यक्तीची ओळख किंवा खासगी माहिती सार्वजनिक करणे हा गंभीर गुन्हा मानला जातो. दोषी आढळल्यास संबंधितांना कारावासासह कठोर शिक्षा होऊ शकते.

पोलिस प्रशासनाने स्पष्ट शब्दांत इशारा दिला आहे की, कोणत्याही व्यक्तीने असे व्हिडिओ फॉरवर्ड, शेअर किंवा सेव्ह केल्यास त्याच्यावरही गुन्हा दाखल केला जाईल. फक्त मूळ व्हिडिओ तयार करणाऱ्यावरच नव्हे, तर तो पुढे पाठवणाऱ्या प्रत्येक व्यक्तीवर कायदेशीर जबाबदारी निश्चित केली जाईल. इतकेच नव्हे तर, अशा प्रकारचे व्हिडिओ ज्या व्हॉट्सअॅप किंवा टेलिग्राम ग्रुपमध्ये शेअर केले जातात, त्या ग्रुपच्या अॅडमिनवरही कारवाई होऊ शकते, असे पोलिसांनी स्पष्ट केले आहे.

या पार्श्वभूमीवर पोलिसांनी नागरिकांना आवाहन केले आहे की, त्यांच्या मोबाईलमध्ये किंवा सोशल मीडिया अकाउंटमध्ये असे कोणतेही व्हिडिओ असल्यास तात्काळ डिलीट करावेत. तसेच अशा प्रकारच्या संवेदनशील सामग्रीचा कोणत्याही परिस्थितीत प्रसार करू नये. नागरिकांनी जबाबदारीने वागणे अत्यंत गरजेचे असल्याचे पोलिसांनी सांगितले.

तपासासाठी स्वतंत्र पोलिस पथके तयार करण्यात आली असून आरोपींचा शोध घेण्यासाठी विविध ठिकाणी छापे टाकले जात आहेत. याशिवाय सायबर सेलच्या मदतीने व्हिडिओंचा स्त्रोत, त्यांचा प्रसार मार्ग आणि संबंधित व्यक्तींची ओळख पटवण्याचे काम युद्धपातळीवर सुरू आहे.

व्हिडिओंचा गैरवापर थांबवा, अन्यथा कठोर कारवाई

अशोक खरात प्रकरण आधीच गंभीर स्वरूपाचे असताना या व्हिडिओ प्रकरणामुळे त्यात आणखी गुंतागुंत वाढली आहे. पोलिसांनी स्पष्ट केले आहे की, पीडित महिलांचा सन्मान राखणे ही प्रत्येकाची सामाजिक आणि नैतिक जबाबदारी आहे. त्यामुळे कोणीही अशा व्हिडिओंचा गैरवापर करू नये. अन्यथा संबंधितांवर तात्काळ गुन्हा दाखल करून कठोर कारवाई केली जाईल.
या घटनेमुळे सोशल मीडिया वापरातील जबाबदारी आणि कायदेशीर मर्यादा याबाबत पुन्हा एकदा जागरूकता निर्माण झाली आहे. एका क्लिकमुळे गंभीर कायदेशीर अडचणीत सापडण्याची शक्यता असल्याने नागरिकांनी सतर्क राहण्याचे आवाहन करण्यात आले आहे.

Direct cases to be filed against those sharing obscene videos; action to be taken against group admins too

महत्वाच्या बातम्या