विशेष प्रतिनिधी
पुणे : महापालिका निवडणुकीसाठी भाजपकडून उमेदवारी मिळविण्यासाठी इच्छुकांची अक्षरशः झुंबड उडाल्याचे चित्र शनिवारी शहरात पाहायला मिळाले. पक्षाशी असलेली एकनिष्ठा, प्रभागात केलेली कामे, जनसंपर्क, नागरिकांमधील प्रतिमा आणि मी उमेदवारीसाठी कसा किंवा कशी योग्य आहे, हे पटवून देण्यासाठी अनेक इच्छुकांनी थेट पीपीटी प्रेझेंटेशन, कामांच्या फाइल्स आणि कागदपत्रांसह मुलाखतींना हजेरी लावली. मात्र, अर्जांची संख्या प्रचंड असल्याने प्रत्येक उमेदवाराला अवघे चार ते पाच मिनिटेच देण्यात आल्याने भाजपच्या या ‘फास्ट ट्रॅक इंटरव्ह्यू’मुळे इच्छुकांमध्ये धाकधूक वाढल्याचे स्पष्टपणे दिसून आले. BJP’s ‘fast track’ interviews
पुण्यातील ४१ प्रभागांसाठी भाजपकडे तब्बल २,५०० इच्छुकांनी उमेदवारी अर्ज दाखल केले आहेत. या अर्जदारांच्या मुलाखती शनिवारी भाजपच्या शहर कार्यालयात सुरू झाल्या असून रविवारीही त्या सुरू राहणार आहेत. भाजपचे शहराध्यक्ष धीरज घाटे, माजी सभागृह नेते गणेश बीडकर आणि श्रीनाथ भिमाले यांनी या मुलाखती घेतल्या. पुण्यातील आठ विधानसभा मतदारसंघांनुसार विभागणी करून स्वतंत्र मुलाखती घेण्यात आल्या. त्यात धीरज घाटे आणि गणेश बीडकर यांनी प्रत्येकी तीन, तर श्रीनाथ भिमाले यांनी दोन विधानसभा मतदारसंघांतील इच्छुकांची मुलाखत घेतली.
या मुलाखती दरम्यान उमेदवारांची इच्छाशक्ती, आतापर्यंत केलेली कामे, प्रभागातील पकड, सामाजिक वर्चस्व, जनसंपर्क आणि निवडणूक जिंकण्याची क्षमता याबाबत सविस्तर प्रश्न विचारण्यात आले. यंदा किमान १२५ नगरसेवक निवडून आणण्याचे लक्ष्य भाजपने ठेवले असून त्यासाठी सक्षम उमेदवारांची चाचपणी करण्यात येत असल्याचे पक्षनेत्यांकडून स्पष्ट करण्यात आले. त्यामुळे या मुलाखती केवळ औपचारिक न राहता, प्रत्येक इच्छुकाच्या राजकीय ताकदीची आणि कामगिरीची कसोटी ठरणार आहे.
अनेक इच्छुकांनी मी काय केलं यावर भर देत आपल्या कामांचा पाढा वाचला, तर काहींनी थेट प्रेझेंटेशनद्वारे आकडेवारी, छायाचित्रे आणि विकासकामांचे दाखले मांडले. काही इच्छुकांनी तर जाडजूड फाइल्स, अहवाल आणि कागदपत्रांचा गठ्ठा घेऊन मुलाखतीला हजेरी लावली होती. मात्र, इच्छुकांची संख्या अपेक्षेपेक्षा जास्त असल्याने मुलाखतीचा कालावधी अत्यंत मर्यादित ठेवण्यात आला. अवघ्या चार ते पाच मिनिटांत आपली बाजू मांडावी लागत असल्याने काही जण प्रश्नांच्या सरबत्तीने गोंधळले, तर काहींनी नेमकेपणाने आणि आत्मविश्वासाने उत्तरे देत वरिष्ठांचे लक्ष वेधून घेतले. काही इच्छुक मात्र ‘उमेदवारी मिळणारच’ या आत्मविश्वासात दिसत होते.
मुलाखतीनंतर राजकीय वातावरण अधिकच तापले आहे. काहींच्या चेहऱ्यावर उमेदवारी जवळ आल्याचा आत्मविश्वास दिसत होता, तर काही जण ‘आपलं काही चुकलं तर नाही ना?’ या चिंतेत होते. चार मिनिटांत राजकीय भविष्य ठरणार का, असा सवाल अनेकांच्या चेहऱ्यावर उमटलेला दिसत होता.
भाजपकडून यावेळी स्पष्ट संकेत देण्यात आले की, केवळ जुन्या ओळखी, पदे किंवा गटबाजीच्या जोरावर उमेदवारी मिळणार नाही. काम, जनसंपर्क, संघटनात्मक ताकद आणि जिंकण्याची क्षमता या निकषांवरच अंतिम निर्णय घेतला जाणार आहे. त्यामुळे आगामी काही दिवसांत उमेदवारीवरून चर्चा आणि राजकीय हालचालींना आणखी वेग येणार, हे निश्चित मानले जात आहे.
२०१७ च्या महापालिका निवडणुकीत भाजपचे ९८ नगरसेवक निवडून आले होते. त्यानंतर शिवसेनेचे पाच माजी नगरसेवक भाजपमध्ये दाखल झाले आहेत. यंदा भाजप १२५ नगरसेवक निवडून आणण्याच्या तयारीत असून, २०१७ मध्ये काही मतांनी पराभूत झालेल्यांना पुन्हा संधी देण्याबाबतही सकारात्मक विचार सुरू असल्याचे सूत्रांकडून सांगण्यात आले.
अर्ज करणाऱ्यांत माजी नगरसेवकांसह इतर पक्षांतील मान्यवरांचाही समावेश आहे. या अर्जांची प्राथमिक छाननी करण्यात आली असून त्यानुसार डीपी रस्त्यावरील शहर कार्यालयात मुलाखती घेतल्या जात आहेत, अशी माहिती निवडणूक प्रमुख गणेश बीडकर यांनी दिली. शहराध्यक्षांसह पक्षाच्या कोअर कमिटीचे सदस्य यावेळी उपस्थित आहेत.
प्रभागनिहाय अर्ज
भाजपकडे एकूण २,५०० अर्ज प्राप्त झाले असून प्रभाग क्रमांक २९ मध्ये सर्वाधिक ९० अर्ज आले आहेत. प्रभाग क्रमांक २८ मध्ये ६०, तर प्रभाग क्रमांक २४ मध्ये ५८ अर्ज मिळाले आहेत. सर्वात कमी अर्ज प्रभाग क्रमांक ६ आणि १४ मधून प्रत्येकी १५ आले आहेत. बहुतांश प्रभागांमध्ये अर्जांची संख्या ३० पेक्षा अधिक आहे.
आमच्या मुलाखती सर्वांसमोर नको
भाजपबरोबरच पक्षाबाहेरील काही इच्छुकांनीही अर्ज भरल्याने शनिवारी व रविवारी होणाऱ्या मुलाखतीत पक्षाबाहेरील माजी नगरसेवकांची चांगलीच कोंडी झाली आहे. आमच्या मुलाखती सर्वांसमोर नको, अशी भूमिका काहींनी घेतल्याची माहिती सूत्रांनी दिली. राष्ट्रवादी काँग्रेस, काँग्रेस, शिवसेना ठाकरे पक्ष आणि राष्ट्रवादी काँग्रेस शरदचंद्र पवार पक्षातील अनेक जण भाजपच्या वाटेवर असून, त्यापैकी काहींचा प्रवेश पुढील आठवड्यात वरिष्ठांच्या सूचनेनुसार होईल, असे शहराध्यक्ष धीरज घाटे यांनी सांगितले.
मोठ्या प्रमाणात अर्ज आल्याने शनिवारी आणि रविवारी इच्छुक उमेदवारांच्या मुलाखती घेण्यात आल्या. उमेदवारांचा जनसंपर्क, त्यांनी केलेली कामे आणि निवडून येण्याची क्षमता याचा विचार करूनच तिकीट दिले जाणार आहे, असे भाजप पुणे शहराध्यक्ष धीरज घाटे म्हणाले.
मुलाखतीदरम्यान उमेदवारांना विविध प्रश्न विचारून ते निवडणूक लढण्यास सक्षम आहेत की नाही, याचा अभ्यास करण्यात आला. ज्यांनी पक्षसंघटनेची कामे केली आहेत आणि पक्षाला वेळ दिला आहे, अशांवर अन्याय न होता त्यांना उमेदवारी दिली जाईल, असे भाजपचे माजी सभागृह नेते व महापालिका निवडणूक प्रभारी गणेश बीडकर यांनी सांगितले.
BJP’s ‘fast track’ interviews create fear among aspirants; Candidacy test in four minutes
महत्वाच्या बातम्या
- राज्य निवडणूक आयोगाच्या आयुक्तांना हटवण्यासाठी काँग्रेस आक्रमक, नाना पटोले मांडणार ठराव
- Padalkar–Awhad : पडळकर – आव्हाड राड्यात कार्यकर्त्यांना शिक्षा, समितीने केली कारवाईची शिफारस
- चऱ्होली येथे व्यावसायिकाच्या डोक्यात गोळ्या घालून ठार केल्याच्या गुन्ह्यात फरार माजी नगरसेवक किसन तापकीरवर मोक्का
- निवडणूक 20 दिवस पुढे ढकलून निकाल फिरवण्याचे काम, विजय वडेट्टीवार यांचा महायुतीवर आरोप
