विशेष प्रतिनिधी
नवी दिल्ली: शिवसेना (उद्धव बाळासाहेब ठाकरे) पक्षाच्या संसदीय दलाच्या बैठकीनंतर पक्षाने बंडखोर खासदारांविरोधात आक्रमक भूमिका घेतली आहे. बैठकीला अनुपस्थित राहिलेल्या सहा खासदारांना कारणे दाखवा नोटीस बजावण्यात येणार असून सात दिवसांच्या आत समाधानकारक उत्तर न दिल्यास पुढील पक्षीय आणि कायदेशीर कारवाई केली जाईल, असा इशारा खासदार अरविंद सावंत यांनी दिला आहे.
दिल्लीतील संसद भवन परिसरात गुरुवारी झालेल्या संसदीय पक्षाच्या बैठकीसाठी पक्षाने सर्व लोकसभा खासदारांना व्हीप जारी केला होता. मात्र, लोकसभेतील नऊ खासदारांपैकी केवळ अरविंद सावंत आणि राजाभाऊ वाजे हे दोन खासदार उपस्थित राहिले. राज्यसभेतील संजय राऊत आणि अनिल देसाई यांनीही बैठकीत सहभाग घेतला.
बैठकीनंतर पत्रकार परिषदेत बोलताना अरविंद सावंत म्हणाले, “पक्षाचा आदेश सर्व खासदारांना मिळाला होता. तरीही काही सदस्य बैठकीला गैरहजर राहिले. हा पक्षद्रोह असल्याचे आम्हाला वाटते. आजच त्यांना कारणे दाखवा नोटीस पाठवण्यात येईल. सात दिवसांच्या आत त्यांना उत्तर द्यावे लागेल.”
सावंत यांनी स्पष्ट केले की, या प्रकरणी लोकसभा अध्यक्षांनाही पत्र पाठवले जाणार आहे. “कायद्यानुसार जी कारवाई होईल ती केली जाईल. आम्ही अध्यक्षांकडेही याबाबत तक्रार करणार आहोत,” असे त्यांनी सांगितले.
दरम्यान, शिवसेना (यूबीटी) खासदार संजय राऊत यांनी बैठकीपूर्वी पत्रकार परिषदेत बंडखोर खासदारांवर जोरदार टीका केली. “जे बैठकीला आले ते आमच्यासोबत आहेत, जे आले नाहीत ते गद्दार आहेत,” असे ते म्हणाले. तसेच काही खासदारांचे ‘अपहरण’ करण्यात आले असावे, असा गंभीर आरोपही त्यांनी केला.
“शिंदे गटाच्या लोकांनी त्यांना कुठेतरी ठेवले आहे का, त्यांच्या जीवाला धोका आहे का, हे तपासण्याची गरज आहे. हे लोक काहीही करू शकतात,” असा आरोप राऊत यांनी केला. मात्र, या आरोपांना कोणताही पुरावा सादर करण्यात आलेला नाही.
दरम्यान, शिवसेनेचे विधान परिषद सदस्य चंद्रकांत रघुवंशी यांनी दावा केला आहे की, उद्धव ठाकरे गटाचे सहा खासदार शिवसेनेत (शिंदे गट) सामील झाले असून ‘ऑपरेशन टायगर’ पूर्ण झाले आहे.
सूत्रांच्या माहितीनुसार, बंडखोर खासदारांनी स्वतंत्र गट स्थापन करण्यासाठी लोकसभा अध्यक्ष ओम बिर्ला यांना पत्र दिल्याची चर्चा आहे. तथापि, या दाव्याला अद्याप अध्यक्ष कार्यालय किंवा संबंधित खासदारांकडून अधिकृत दुजोरा मिळालेला नाही.
या चर्चांवर प्रतिक्रिया देताना अरविंद सावंत यांनी आव्हानात्मक भूमिका घेतली. “जर पत्र दिले असेल तर ते सार्वजनिक करावे. त्यांचे पत्र कुठे आहे ते दाखवावे. आम्ही सर्व काही उघडपणे करतो, ते मात्र लपून-छपून काम करत आहेत,” असे ते म्हणाले.
संजय राऊत यांनी काही खासदारांच्या ठिकाणाबाबतही माहिती दिली. “ओमराजे निंबाळकर हे दिल्लीत नसून पुण्यात आहेत, तर संजय दिना पाटील मुंबईत आहेत. ते बैठकीला आले नाहीत, पण ते बंडखोर गटात आहेत की नाहीत, हे स्पष्ट नाही,” असे त्यांनी सांगितले.
बंडखोर खासदारांच्या भूमिकेमुळे ठाकरे गटासमोर मोठे राजकीय आव्हान उभे राहिले असून आता या प्रकरणाचा निर्णय लोकसभा अध्यक्षांची भूमिका, संभाव्य अपात्रता कारवाई आणि पुढील न्यायालयीन लढाई यावर अवलंबून राहणार आहे.
Thackeray camp warns absent MPs: Reply within seven days or face action
महत्वाच्या बातम्या
- Nagpur : कर्करोगावरील उपचार, संशोधनासाठी नागपूरला हाय एनर्जी मेडिकल सायक्लोट्रोन प्रकल्प
- महाराष्ट्र पोलिसांना मिळणार आधुनिक तंत्रज्ञानाची जोड, केंद्र सरकारकडून योजना मंजूर
- मुठा नदीपात्र स्वच्छता अभियानात पर्यावरणप्रेमींचा उत्स्फूर्त सहभाग
- शपथा आणि शिवबंधन नव्हे, माणुसकीच्या बंधनाने खासदार टिकतात, नवनाथ बन यांचा टोला
