विशेष प्रतिनिधी
नवी दिल्ली : भारत आणि पाकिस्तान यांच्यातील क्रीडा संबंधांबाबत केंद्र सरकारने पुन्हा एकदा आपली स्पष्ट भूमिका मांडली आहे. सरकारच्या निर्णयानुसार, दोन्ही देशांदरम्यान कोणत्याही द्विपक्षीय क्रीडा मालिका आयोजित केल्या जाणार नाहीत. भारतीय संघ पाकिस्तानात खेळण्यासाठी जाणार नाहीत, तसेच पाकिस्तानी संघांनाही भारतात येऊन द्विपक्षीय सामने खेळण्याची परवानगी दिली जाणार नाही.
सीमापार दहशतवाद, सुरक्षा विषयक चिंता आणि दोन्ही देशांतील तणावपूर्ण राजनैतिक संबंध लक्षात घेऊन हा निर्णय कायम ठेवण्यात आल्याचे सूत्रांनी सांगितले. गेल्या अनेक वर्षांपासून भारत आणि पाकिस्तान यांच्यात क्रिकेटसह इतर खेळांमध्ये द्विपक्षीय मालिका बंद आहेत. दोन्ही देश केवळ आयसीसी, आशियाई स्पर्धा किंवा अन्य आंतरराष्ट्रीय बहुपक्षीय स्पर्धांमध्येच एकमेकांविरुद्ध खेळताना दिसतात.
केंद्र सरकारने स्पष्ट केले की, वर्ल्ड कप, चॅम्पियन्स ट्रॉफी, आशियाई स्पर्धा किंवा आंतरराष्ट्रीय महासंघांच्या अखत्यारित येणाऱ्या स्पर्धांसाठी मात्र पाकिस्तानी खेळाडूंना भारतात येण्याची मुभा राहील. आंतरराष्ट्रीय क्रीडा संघटनांच्या नियमांचे पालन करणे आणि स्पर्धा सुरळीत पार पाडणे या उद्देशाने ही सवलत कायम ठेवण्यात आली आहे.
सरकारच्या या भूमिकेमुळे आगामी काळात भारत-पाकिस्तान यांच्यात स्वतंत्र क्रिकेट मालिका होण्याची शक्यता जवळपास संपुष्टात आली आहे. बीसीसीआयनेही यापूर्वी केंद्र सरकारच्या परवानगीशिवाय पाकिस्तानविरुद्ध कोणतीही द्विपक्षीय मालिका खेळली जाणार नसल्याचे स्पष्ट केले होते.
विशेष म्हणजे, भारतात होणाऱ्या मोठ्या आंतरराष्ट्रीय स्पर्धांमध्ये पाकिस्तानच्या सहभागावर अनेकदा राजकीय आणि सुरक्षेच्या मुद्द्यांवरून वाद निर्माण झाले आहेत. मात्र, आंतरराष्ट्रीय क्रीडा महासंघांच्या नियमांनुसार यजमान देशाला सहभागी देशांच्या खेळाडूंना व्हिसा आणि प्रवेश देणे बंधनकारक असते. त्यामुळे बहुपक्षीय स्पर्धांसाठी पाकिस्तानला अपवाद ठेवण्यात आला आहे.
क्रीडा क्षेत्रातील तज्ज्ञांच्या मते, भारत-पाकिस्तान सामने हे जागतिक स्तरावर सर्वाधिक चर्चिले जाणारे आणि प्रेक्षकांना आकर्षित करणारे सामने मानले जातात. तरीही सुरक्षा आणि राष्ट्रीय हिताला प्राधान्य देत केंद्र सरकारने कठोर भूमिका कायम ठेवली आहे.
Centre reiterates clear stand: No entry for Pakistani teams in India for bilateral series
महत्वाच्या बातम्या
- सुनेत्रा पवारांनी देशातील सर्वात मोठ्या मताधिक्याचा रेकॉर्ड मोडला
- सुनेत्रा पवारांनी मोडला अजितदादांचा 2024मधील विक्रम; १ लाख १२ हजार २६८ मतांनी आघाडीवर
- विजयचा दणका, स्टॅलिन यांच्यासह द्रमुक मंत्रिमंडळातील 32 पैकी 31 मंत्री पिछाडीवर
- बंगाल-आसाममध्ये भाजपची झेप; तामिळनाडूत थलपती विजयच्या पक्षाची ‘ब्लॉकबस्टर’ एन्ट्री, केरळमध्ये काँग्रेसला दिलासा
