राष्ट्रवादीत पुन्हा अंतर्गत कलह? अजित पवारांविषयी कथित ऑडिओ क्लिपवरून नवा वाद

विशेष प्रतिनिधी

मुंबई : राष्ट्रवादी काँग्रेसमध्ये पुन्हा एकदा अंतर्गत संघर्ष उफाळून आल्याचे चित्र समोर येत आहे. पक्षाचे आमदार रोहित पवार यांनी अजित पवारांविषयी पक्षातीलच दोन वरिष्ठ नेते अत्यंत खालच्या भाषेत बोलत असल्याची कथित ऑडिओ क्लिप अस्तित्वात असल्याचा दावा केला आहे. या दाव्यानंतर राष्ट्रवादी काँग्रेसच्या दोन्ही गटांमध्ये राजकीय चर्चांना वेग आला असून, पक्षातील अंतर्गत मतभेद पुन्हा ऐरणीवर आले आहेत.
एका वृत्तवाहिनीला दिलेल्या मुलाखतीत बोलताना रोहित पवार यांनी हा खळबळजनक दावा केला. त्यांनी सांगितले की, अजित पवारांविरोधात बोलणाऱ्या दोन मोठ्या नेत्यांची ऑडिओ क्लिप पक्षातील काही महत्त्वाच्या नेत्यांनी ऐकली आहे. ही क्लिप सुनेत्रा पवार आणि पार्थ पवार यांनाही ऐकवण्यात आल्याचा दावा त्यांनी केला. केंद्रीय निवडणूक आयोगाकडे पत्र पाठवण्यापूर्वीच राष्ट्रवादीतील एका वरिष्ठ नेत्यामार्फत ही क्लिप सुनेत्रा पवार यांच्यापर्यंत पोहोचवण्यात आल्याचेही त्यांनी म्हटले.

• Chief Minister : मुलींच्या व्यथा ऐकून मुख्यमंत्री संतापले, राज्यातील सर्व वसतिगृहात कुलर लावण्याचे आदेश

रोहित पवार यांच्या या वक्तव्यामुळे राष्ट्रवादी काँग्रेसमधील अंतर्गत गटबाजी पुन्हा चर्चेत आली आहे. गेल्या काही महिन्यांपासून पक्षातील विविध नेत्यांमध्ये सुरू असलेल्या सूचक आरोप-प्रत्यारोपांमुळे वातावरण आधीच तापलेले असताना, आता कथित ऑडिओ क्लिपच्या दाव्यामुळे राजकीय वर्तुळात नवे तर्क-वितर्क सुरू झाले आहेत.
दरम्यान, या प्रकरणावर अजित पवार गटातील नेते आणि माजी आमदार अमोल मिटकरी यांनीही तीव्र प्रतिक्रिया दिली. सुरुवातीला त्यांनी अशा ऑडिओ क्लिपच्या सत्यतेवर प्रश्नचिन्ह उपस्थित करत राष्ट्रवादी काँग्रेसला जाणीवपूर्वक लक्ष्य केले जात असल्याचा आरोप केला. मात्र, जर खरोखरच अजित पवारांविषयी कोणी आक्षेपार्ह भाषेत बोलले असेल, तर त्या व्यक्तीला माफी दिली जाणार नाही, असा स्पष्ट इशारा त्यांनी दिला.
“अजितदादांविषयी खालच्या पातळीवर बोलणारा नेता कितीही मोठा असला तरी त्याला सोडणार नाही. त्याला व्याजासहित उत्तर दिले जाईल,” असे ठाम शब्दांत अमोल मिटकरी म्हणाले. त्यांच्या या प्रतिक्रियेमुळे राष्ट्रवादीतील अंतर्गत नाराजी अधिक तीव्र असल्याची चर्चा राजकीय वर्तुळात रंगू लागली आहे.
दरम्यान, राष्ट्रवादी काँग्रेसमध्ये सुरू असलेल्या या आरोप-प्रत्यारोपांमुळे पक्षातील अंतर्गत समीकरणांबाबत पुन्हा प्रश्नचिन्ह निर्माण झाले आहे. एका बाजूला पक्ष एकसंध असल्याचा दावा वरिष्ठ नेते करत असले, तरी दुसऱ्या बाजूला समोर येणाऱ्या दावे आणि प्रतिक्रियांमुळे कार्यकर्त्यांमध्ये संभ्रमाचे वातावरण आहे.
विशेष म्हणजे, आगामी स्थानिक स्वराज्य संस्था निवडणुका आणि राज्यातील बदलत्या राजकीय समीकरणांच्या पार्श्वभूमीवर राष्ट्रवादी काँग्रेसमधील अंतर्गत मतभेद अधिक गंभीर ठरू शकतात, अशी चर्चा राजकीय निरीक्षकांमध्ये सुरू आहे.

Fresh internal rift in NCP? New controversy erupts over alleged audio clip on Ajit Pawar