विशेष प्रतिनिधी
नवी दिल्ली : वैद्यकीय शिक्षणाच्या प्रवेशासाठी अत्यंत महत्त्वाची मानली जाणारी ‘नीट-यूजी २०२६’ परीक्षा पेपरफुटीच्या आरोपांमुळे अखेर रद्द करण्यात आल्याने केंद्र सरकारवर विरोधकांनी जोरदार हल्लाबोल सुरू केला असून, काँग्रेस नेते राहुल गांधी यांनी थेट पंतप्रधान नरेंद्र मोदी आणि केंद्र सरकारला लक्ष्य केले आहे.
राहुल गांधी यांनी सोशल मीडियावरील ‘X’ प्लॅटफॉर्मवरून सरकारवर कठोर टीका करत केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी केली. “वारंवार पेपर फुटत असताना पंतप्रधान नरेंद्र मोदी गप्प का आहेत? विद्यार्थ्यांच्या भविष्याशी खेळ करणाऱ्या व्यवस्थेची जबाबदारी कोण घेणार?” असा सवाल त्यांनी उपस्थित केला.
राहुल गांधी यांनी २०२४ मधील ‘नीट’ पेपरफुटी प्रकरणाची आठवण करून देत सरकारवर निष्क्रियतेचा आरोप केला. त्यांनी लिहिले की, “NEET २०२४ मध्ये पेपर फुटला, परीक्षा रद्द झाली नाही, मंत्र्यांनी राजीनामा दिला नाही, सीबीआय चौकशी सुरू झाली आणि एक समिती स्थापन झाली. आता NEET २०२६ मध्ये पुन्हा तोच प्रकार घडला. परीक्षा रद्द झाली, पण मंत्री अजूनही पदावर आहेत. पुन्हा सीबीआय चौकशी आणि पुन्हा समिती. म्हणजे दोन वर्षांत बदललं तरी काय?”
काँग्रेससह अनेक विरोधी पक्षांनी केंद्र सरकारवर शिक्षण व्यवस्थेतील अपयशाचा आरोप करत देशभरात आंदोलनाची चेतावणी दिली आहे. काही विद्यार्थी संघटनांनीही परीक्षा प्रक्रियेत पारदर्शकता आणण्याची मागणी केली आहे.
तपास सीबीआयकडे, अनेक संशयित ताब्यात
दरम्यान, केंद्र सरकारने या प्रकरणाचा तपास Central Bureau of Investigation अर्थात सीबीआयकडे सोपवला आहे. तपास यंत्रणांनी विविध राज्यांमध्ये छापेमारी करत अनेक संशयितांना ताब्यात घेतले असून, पेपरफुटीमागील संपूर्ण रॅकेट उघड करण्याचे प्रयत्न सुरू आहेत. बिहार, राजस्थान, उत्तर प्रदेश आणि महाराष्ट्रासह काही राज्यांमध्ये या गैरव्यवहाराचे धागेदोरे सापडल्याची माहिती सूत्रांकडून मिळत आहे.
तपासात काही कोचिंग सेंटर, मध्यस्थ एजंट आणि तांत्रिक माध्यमांचा वापर करून प्रश्नपत्रिका परीक्षेपूर्वीच बाहेर पोहोचवल्याचा संशय व्यक्त केला जात आहे. काही उमेदवारांकडून मोठ्या रकमांची देवाणघेवाण झाल्याचाही तपास सुरू आहे.
लाखो विद्यार्थ्यांमध्ये संभ्रम आणि मानसिक ताण
पेपरफुटीमुळे परीक्षा रद्द झाल्याने देशभरातील लाखो विद्यार्थी आणि पालक चिंतेत आहेत. अनेक विद्यार्थ्यांनी महिनोनमहिने केलेल्या तयारीनंतर परीक्षा दिली होती. मात्र, आता पुढील महिन्यात फेरपरीक्षा होणार असल्याने विद्यार्थ्यांवर पुन्हा अभ्यासाचा आणि मानसिक ताण वाढला आहे.विद्यार्थी संघटनांनी “प्रामाणिक विद्यार्थ्यांना शिक्षा का?” असा सवाल उपस्थित करत दोषींवर कठोर कारवाईची मागणी केली आहे. काही पालकांनी सर्वोच्च न्यायालयात याचिका दाखल करण्याची तयारी सुरू केली असल्याची माहिती आहे.
गेल्या काही वर्षांत विविध स्पर्धा परीक्षा आणि भरती प्रक्रियांमध्ये पेपरफुटीच्या घटना वारंवार समोर आल्याने देशातील परीक्षा व्यवस्थेच्या विश्वासार्हतेवर गंभीर प्रश्नचिन्ह निर्माण झाले आहे. शिक्षणतज्ज्ञांनी परीक्षा प्रणाली पूर्णपणे डिजिटल आणि सुरक्षित करण्यासाठी स्वतंत्र राष्ट्रीय यंत्रणा उभारण्याची मागणी केली आहे.
या प्रकरणामुळे केंद्र सरकारची मोठी कोंडी झाली असून, आगामी काळात संसदेतही हा मुद्दा गाजण्याची शक्यता व्यक्त केली जात आहे.
Rahul Gandhi attacks Modi government over NEET-UG 2026 paper leak controversy
महत्वाच्या बातम्या
