विशेष प्रतिनिधी
मुंबई: पाकिस्तानातील बलुचिस्तानमध्ये सुरू असलेल्या स्वातंत्र्य चळवळीला नवे वळण मिळाल्याचा दावा समोर आला आहे. ‘रिपब्लिक ऑफ बलुचिस्तान’ या नावाने प्रसिद्ध झालेल्या एका निवेदनात बलुचिस्तानने स्वतःला स्वतंत्र आणि सार्वभौम राष्ट्र म्हणून घोषित केल्याचा दावा करण्यात आला आहे. तसेच स्वतंत्र ध्वज, चलन आणि राष्ट्रगीत जाहीर केल्याचेही या निवेदनात म्हटले आहे. मात्र, या सर्व दाव्यांना अद्याप कोणत्याही देशाने किंवा संयुक्त राष्ट्रांनी अधिकृत मान्यता दिलेली नाही. Balochistan
व्हायरल होत असलेल्या पत्रानुसार, नव्या राष्ट्राने ‘बलोची फालूस’ नावाचे चलन जारी केले असून, ‘मां चुकैन बलोचानी’ हे गीत अधिकृत राष्ट्रगीत म्हणून स्वीकारल्याचा दावा करण्यात आला आहे. तसेच बलुचिस्तानच्या सुमारे ८५ टक्के भूभागावर स्थानिक बलोच लढवय्यांचे नियंत्रण असल्याचेही पत्रात नमूद करण्यात आले आहे. मात्र, या दाव्यांची स्वतंत्र पडताळणी झालेली नाही.
गेल्या काही दिवसांत बलुचिस्तानमध्ये बलोच लिबरेशन आर्मी (BLA) आणि इतर फुटीरतावादी गटांनी पाकिस्तानी सुरक्षा दलांवर अनेक मोठे हल्ले केले आहेत. त्यानंतर पाकिस्तानने मोठ्या प्रमाणावर लष्करी कारवाई सुरू केली असून, अनेक दहशतवाद्यांना ठार केल्याचा दावा इस्लामाबादने केला आहे. या संघर्षामुळे संपूर्ण प्रदेशातील सुरक्षा परिस्थिती अधिकच तणावपूर्ण बनली आहे.
पाकिस्तानचे लष्करप्रमुख जनरल असीम मुनीर यांच्यासाठीही ही परिस्थिती मोठे आव्हान मानली जात आहे. बलुचिस्तानमध्ये पाकिस्तानी सैन्याला अपेक्षित यश मिळत नसल्याच्या चर्चा सुरू असतानाच, स्वातंत्र्याच्या दाव्यामुळे पाकिस्तानच्या अंतर्गत सुरक्षेबाबत नवे प्रश्न उपस्थित झाले आहेत. तथापि, पाकिस्तान सरकारने बलुचिस्तानवरील आपले नियंत्रण कायम असल्याचा दावा केला आहे आणि फुटीरतावादी संघटनांविरोधातील कारवाई सुरूच राहणार असल्याचे स्पष्ट केले आहे.
बलुचिस्तान हा नैसर्गिक वायू, तांबे, सोने आणि इतर खनिज संपत्तीने समृद्ध प्रदेश असून, अनेक दशकांपासून तेथे स्वायत्तता आणि स्वातंत्र्याची मागणी करणारी चळवळ सुरू आहे. या पार्श्वभूमीवर समोर आलेली ‘रिपब्लिक ऑफ बलुचिस्तान’ची घोषणा प्रादेशिक राजकारणात मोठी चर्चा ठरत असली, तरी तिची आंतरराष्ट्रीय स्तरावर अद्याप अधिकृत मान्यता मिळालेली नाही.
Balochistan declares independence, poses new challenge to Pakistan
महत्वाच्या बातम्या
