विशेष प्रतिनिधी
सोलापूर: सोलापूर जिल्ह्यातील पंढरपूर-म्हसवड मार्गावर रविवारी संध्याकाळच्या सुमारास एक अत्यंत भीषण आणि काळजाचा थरकाप उडवणारा अपघात घडला आहे. तांदूळवाडी गावाजवळ भाविकांनी भरलेली एक पिकअप गाडी थेट विहिरीत कोसळल्याने १४ जणांचा जागीच दुर्दैवी मृत्यू झाला आहे. या भीषण अपघातामुळे संपूर्ण परिसरावर शोककळा पसरली आहे.
देवदर्शन करून परतताना काळाचा घाला
मिळालेल्या माहितीनुसार, हे सर्व मृत भाविक पंढरपूर तालुक्यातील ‘रांजणी’ गावचे रहिवासी होते. म्हसवड येथील प्रसिद्ध सिद्धनाथ देवाचे दर्शन घेऊन ते सर्वजण आपल्या गावी परतत होते. रविवारी दिनांक १४ जून रोजी सायंकाळी साडेसहा वाजताच्या सुमारास त्यांची पिकअप गाडी तांदूळवाडी (ता. माळशिरस) गावाजवळ आली असता, चालकाचे वाहनावरील नियंत्रण सुटले आणि गाडी रस्त्याकडेला असलेल्या खोल विहिरीत कोसळली.
अपघात घडताच परिसरातील स्थानिक नागरिकांनी तात्काळ घटनास्थळी धाव घेतली आणि विहिरीत बुडणाऱ्या लोकांना बाहेर काढण्यासाठी शर्थीचे प्रयत्न सुरू केले. या घटनेची माहिती मिळताच पोलीस आणि प्रशासकीय यंत्रणाही घटनास्थळी दाखल झाली. विहिरीतून गाडी आणि मृतदेह बाहेर काढण्याचे काम युद्धपातळीवर करण्यात आले.
एकाच गावातील १४ भाविकांचा अशा अपघाती निधनामुळे रांजणी गावासह संपूर्ण सोलापूर जिल्ह्यावर दुःखाचा डोंगर कोसळला आहे. पोलीस या प्रकरणाचा पुढील तपास करत आहेत
14 devotees killed in tragic pickup truck plunge into well
महत्वाच्या बातम्या
