विशेष प्रतिनिधी
नवी मुंबई : नेरुळ परिसरातील एका हॉस्टेलमध्ये हिंदू देवी-देवतांच्या मूर्ती व देव्हाऱ्याचा कथित अपमान केल्याप्रकरणी एका ख्रिश्चन नर्सविरोधात नेरुळ पोलीस ठाण्यात गुन्हा दाखल करण्यात आला आहे. या घटनेमुळे परिसरात संतापाची लाट उसळली असून आरोपीला तातडीने अटक करण्याची मागणी विविध स्तरांतून केली जात आहे.
मिळालेल्या माहितीनुसार, तक्रारदार हर्षला पाटील या एका हॉस्टेलमध्ये वास्तव्यास असून त्या आपल्या खोलीतील देव्हाऱ्यात श्री गणेश व राधाकृष्ण यांच्या मूर्तींची नियमित पूजा करत होत्या. मे महिन्याच्या अखेरीस त्यांच्यासोबत राहण्यासाठी आलेल्या एका ख्रिश्चन नर्सने देव्हाऱ्याबाबत आक्षेप घेत वारंवार वाद घालण्यास सुरुवात केल्याचा आरोप करण्यात आला आहे.
तक्रारीनुसार, ५ जून २०२६ रोजी हर्षला पाटील कामावरून परत आल्यानंतर त्यांना हॉलमध्ये ठेवलेला देव्हारा जोडे-चपला ठेवण्याच्या जागेजवळ हलवण्यात आल्याचे दिसून आले. तसेच देवांच्या मूर्ती खाली पाडलेल्या अवस्थेत आढळल्या. याबाबत विचारणा केली असता संबंधित नर्सने धार्मिक भावना दुखावतील अशी वक्तव्ये केल्याचा आरोप तक्रारीत करण्यात आला आहे.
या प्रकाराची माहिती रुग्णालय प्रशासनाला देण्यात आल्यानंतर प्रशासनाने तातडीने चौकशी सुरू केली. प्राथमिक तपासानंतर संबंधित नर्सला ६ जून रोजी नोकरीतून निलंबित करण्यात आल्याची माहिती समोर आली आहे.
मात्र, निलंबनाच्या कारवाईनंतरही संबंधित नर्सने पुन्हा एकदा देव्हाऱ्याचा अपमान केल्याचा आरोप करण्यात आला आहे. तक्रारीनुसार, ६ जूनच्या संध्याकाळी सामान घेण्याच्या कारणाने ती हॉस्टेलमध्ये आली आणि हर्षला पाटील यांच्या अनुपस्थितीत देव्हारा पुन्हा चपलांच्या स्टँडजवळ फेकून दिला. तसेच जाताना तिने हर्षला पाटील यांना धमकी दिल्याचाही आरोप करण्यात आला आहे.
या प्रकरणी नेरुळ पोलीस ठाण्यात धार्मिक भावना दुखावणे, धमकी देणे आणि सामाजिक सलोखा बिघडविण्याचा प्रयत्न केल्याप्रकरणी गुन्हा दाखल करण्यात आला आहे. पोलिसांकडून पुढील तपास सुरू असून सर्व संबंधितांच्या जबाबांची नोंद घेण्यात येत आहे.
दरम्यान, या घटनेची सखोल चौकशी करून दोषींवर कठोर कारवाई करावी, अशी मागणी विविध हिंदू संघटनांनी केली आहे. पोलिसांकडून प्रकरणाचा सर्वंकष तपास सुरू असल्याची माहिती देण्यात आली आहे.
Christian Nurse Booked for Allegedly Disrespecting Hindu Deities in Nerul; Arrest Demanded
महत्वाच्या बातम्या
