विशेष प्रतिनिधी
पुणे : पुणे महानगरपालिकेच्या निवडणुकीत वडगावशेरीतील प्रभाग क्रमांक ३ मधून भारतीय जनता पक्षाने खेळलेला धक्कातंत्राचा डाव अखेर यशस्वी ठरलाय. उमेदवारी अर्ज भरण्याच्या अखेरच्या दिवशी भाजपने रणनीतीत बदल करत ऐश्वर्या सुरेंद्र पठारे यांना उमेदवारी दिली आणि निकालाने त्या निर्णयावर शिक्कामोर्तब केलं. ऐश्वर्या पठारे यांनी तब्बल १५ हजारांहून अधिक मताधिक्याने दणदणीत विजय मिळवत रेकॉर्ड केला आहे. विशेष म्हणजे प्रभाग क्रमांक ३ मधील भाजपच्या चारही उमेदवारांनी विजय मिळवला, त्यामुळे या प्रभागावर भाजपचे वर्चस्व स्पष्ट झाले आहे. Aishwarya Pathare
सुरुवातीला या प्रभागातून सुरेंद्र पठारे स्वतः निवडणूक लढवणार असल्याची जोरदार चर्चा होती. मात्र स्थानिक सामाजिक समीकरणे, महिला मतदारांचा वाढता प्रभाव आणि भविष्यातील नेतृत्व घडवण्याच्या दृष्टीने त्यांनी ऐनवेळी निर्णय बदलला. हा निर्णय योग्य ठरल्याचे निकालातून स्पष्ट झाले आहे.
विकासाचा स्पष्ट आराखडा, १०० दिवसांचा अॅक्शन प्लॅन
प्रचारादरम्यान ऐश्वर्या पठारे यांनी भावनिक आवाहनांपेक्षा विकासकामांचा ठोस आराखडा मांडला. लोहगाव आणि विमाननगर परिसरातील रस्ते, पायाभूत सुविधा, पाणीपुरवठा, कचरा व्यवस्थापन, वाहतूक कोंडी यासारख्या मुद्द्यांवर त्यांनी तपशीलवार मांडणी केली. इतकंच नाही तर पहिल्या १०० दिवसांत कोणती कामे पूर्ण केली जाणार याचा लेखाजोखा त्यांनी जाहीरनाम्यातून मांडला. या व्यावहारिक दृष्टिकोनाला मतदारांनी पसंती दिल्याचे दिसून आले.
महिलांसाठी स्वतंत्र जाहीरनामा
या निवडणुकीत महिलांच्या प्रश्नांवर लक्ष केंद्रीत करत ऐश्वर्या पठारे आणि भाजपच्या उमेदवारांनी महिलांसाठी स्वतंत्र जाहीरनामा सादर केला. सुरक्षितता, आरोग्य, रोजगार, स्वावलंबन आणि दैनंदिन सुविधा यावर दिलेला भर हा विजयाचा एक महत्त्वाचा घटक ठरला.
आयटी मतदारांशी थेट नाळ
लोहगाव–विमाननगर परिसरात आयटी क्षेत्रात कार्यरत असलेला उच्चशिक्षित मतदारवर्ग मोठ्या प्रमाणात आहे. ऐश्वर्या पठारे यांनी MIT मधून अभियांत्रिकीचे शिक्षण पूर्ण केले असून, भारतासह परदेशातील नामांकित आयटी कंपन्यांमध्ये त्यांनी काम केले आहे. आयटी क्षेत्रातील प्रत्यक्ष अनुभवामुळे आयटी कर्मचारी, व्यावसायिक आणि तरुण मतदारांशी त्यांचा थेट संवाद साधला गेला. आयटी कर्मचाऱ्यांच्या दैनंदिन अडचणी, कामाच्या वेळांमुळे निर्माण होणाऱ्या नागरी समस्या यावर उपाययोजना करण्याचे आश्वासन त्यांनी दिले होते.
सुरेंद्र पठारेंची मजबूत पकड निर्णायक
या प्रभागात गावकी-भावकीवर आधारित स्थानिक राजकारणाचा प्रभावही आहे. अनेक वर्षांचा जनसंपर्क, स्थानिक प्रश्नांवर केलेले काम आणि संघटनात्मक ताकद यामुळे सुरेंद्र पठारे यांची या भागात मजबूत पकड आहे. हीच पार्श्वभूमी लक्षात घेऊन भाजपने ऐश्वर्या पठारे यांना पुढे केल्याची चर्चा निवडणुकीपूर्वीच रंगली होती. निकालाने ती चर्चा खरी ठरवली.
एकूणच, स्पष्ट विकासदृष्टी, महिलांवर लक्ष केंद्रीत धोरण, आयटी मतदारांशी साधलेला संवाद आणि सुरेंद्र पठारेंची अचूक रणनीती या सर्व घटकांमुळे वडगावशेरीतील प्रभाग क्रमांक ३ मध्ये भाजपला एकतर्फी यश मिळाले असून, ऐश्वर्या पठारे यांचा हा विजय भविष्यातील स्थानिक राजकारणात महत्त्वाचा टर्निंग पॉईंट ठरणार आहे.
Aishwarya Pathare Wins With Record Margin, Surendra Pathare’s Strategy Proves Decisive
महत्वाच्या बातम्या
- Uddhav Thackeray : उद्धव ठाकरेंच्या मेंदूत केमिकल लोच्या, आशिष शेलार यांचा हल्लाबोल
- शाई पुसून गैरकृत्य करणाऱ्यास पुन्हा मतदान करता येणे शक्य नाही, निवडणूक आयोगाचे स्पष्टीकरण
- शाई पुसा आणि पुन्हा मतदान करा हा विकास आहे का? राज ठाकरे यांचा संतप्त सवाल
- निकाल आल्यानंतर कशाला दोष द्यायचा याची तयारी, देवेंद्र फडणवीस यांचा राज ठाकरे यांना टोला
