दिवंगत उपमुख्यमंत्री अजित पवार यांचे पुत्र पार्थ पवार (Parth Pawar) यांना राज्यसभेची उमेदवारी देण्याचा निर्णय राष्ट्रवादी काॅंग्रेस अजित पवार गटाने घेतला आहे. त्यामुळे पार्थ पवार यांची खासदारकी निश्चित झाली आहे.
मुंढवा जमीन घोटाळा प्रकरणात गुन्हा दाखल असलेले दिग्विजय पाटील यांनी पुणे सत्र न्यायालयात दाखल केलेला अटकपूर्व जामीन अर्ज मागे घेतला आहे. गुन्हा नोंद झाल्यानंतर त्यांनी अटक टाळण्यासाठी अटकपूर्व जामिनासाठी अर्ज केला होता. मात्र, पोलिसांनी या प्रकरणात दोषारोपपत्र सादर केल्यानंतर बदललेल्या परिस्थितीच्या आधारे नव्याने अर्ज करण्यासाठी त्यांनी आधीचा अर्ज मागे घेतला आहे. दिग्विजय पाटील हे पार्थ पवार यांचे मामेभाऊ आणि उपमुख्यमंत्री सुनेत्रा पवार यांचे भाचे आहेत.
भारतीय जनता पक्षाने राज्यातील नव्या पदाधिकाऱ्यांची अधिकृत घोषणा केली आहे. नवनाथ बन यांची मुख्य प्रवक्तापदी निवड करण्यात आली आहे. भाजप युवा मोर्चा अध्यक्षपदी कृष्णराज महाडिक यांची नियुक्ती करण्यात आली आहे.
पुण्यात सोमवारी संध्याकाळी काँग्रेस प्रवक्ते हनुमंत पवार यांना हिंदुत्ववादी कार्यकर्ते तुषार दामगुडे आणि त्यांच्या साथीदारांनी मारहाण केल्याची घटना घडली आहे. ही संपूर्ण घटना सीसीटीव्ही कॅमेऱ्यात कैद झाली असून, मारहाणीदरम्यान दामगुडे यांनी आपल्याला पिस्तुल दाखवून धमकावल्याचा आरोप पवार यांनी केला आहे.
ज्यांनी त्यांच्यावर 70 हजार कोटींच्या घोटाळ्याचे आरोप केले आहेत, आज त्यांच्यासोबत ते सत्तेत आहेत. कुणाला किती बदनाम करायचे, आयुष्यातून किती उठवायचे याची मर्यादा पाळली पाहिजे, असे म्हणत शिवसेना ठाकरे गटाचे पक्षप्रमुख उद्धव ठाकरे यांनी अजितदादा पवार यांच्या शोकसभेत भाजपवर टीका केली.
आज या ठिकाणी इतकी मंडळी जमली आहेत, शोकसभेच्या ठिकाणी जर अजितदादांचा आज 75वा वाढदिवस साजरा करायला जमलो असतो, तर जास्त बरं वाटलं असतं,” असे म्हणत ज्येष्ठ अभिनेते नाना पाटेकर यांनी अजित पवार यांच्या फोटोसमोर हात जोडले आणि श्रद्धांजली वाहिली. भावूक होत ते स्टेजवरून खाली उतरले आणि थोडावेळ एका बाजूला निस्तब्ध उभे राहीले. नाना पाटेकर यांचे हे रूप पाहून इतर उपस्थित मंडळीही भावूक झाल्याचे दिसून आले.
मुंबई महापालिकेच्या चार वैधानिक समित्यांपैकी एक असलेल्या बेस्ट समितीच्या अध्यक्षपदी शिवसेनेच्या (शिंदे) तृष्णा विश्वासराव यांची आज बिनविरोध निवड करण्यात आली आहे. बेस्ट समितीच्या निवडणुकीत शिवसेनेकडून(शिंदे) अध्यक्षपदासाठी तृष्णा विश्वासराव यांचा एकमेव अर्ज आला होता. या निवडणुकीत त्यांच्या विरोधात कोणत्याही इतर पक्षाने उमेदवार न दिल्याने पालिका नियमानुसार बेस्ट समितीच्या अध्यक्षपदी तृष्णा विश्वासराव यांची बिनविरोध निवड करण्यात आल्याचे महापौर रितू तावडे यांनी जाहीर केले.
1999 साली मी निवडून आलो, दोन महिन्यात मला त्यांनी मंत्री केलं. नऊवेळा मंत्रिपदाची शपथ घेतली. दादा म्हणायचे की माझी शपथ झाली की साहेब (मुश्रीफ) तुमची शपथ होणारच. सहावेळा निवडून आलो आणि नऊवेळा मी मंत्री झालो. यावेळी ते मला सोडून गेले, असे म्हणताच वैद्यकीय शिक्षण मंत्री हसन मुश्रीफ यांना शोक अनावर झाला. मुश्रीफ अजित दादांच्या आठवणी सांगताना त्यांना दृष्ट लागल्याचे म्हणत धाय मोकलून रडले. अजितदादांच्या शोक प्रस्तावावर बोलताना अनेक नेत्यांना आज भावना अनावर झाल्या.
अजितदादा हे महाराष्ट्राला न मिळालेले सर्वोत्तम मुख्यमंत्री होते.क्षमता, निर्णयक्षमता आणि प्रशासनातील पकड यांचा विचार केला तर मुख्यमंत्रीपदासाठी आवश्यक असलेले सर्व गुण दादांमध्ये होते. राज्याला एक चांगला मुख्यमंत्री मिळू शकला असता; मात्र ते घडले नाही, अशा भावना मुख्यमंत्री देवेंद्र फडणवीस यांनी व्यक्त केल्या.
अजित पवार यांच्या विमान अपघाताचा तपास पारदर्शक व्हायला हवा. या प्रकरणाचे अनेक पुरावे आमच्याकडे आहेत. खुद्द माझ्याकडे जळालेल्या ‘ब्लॅक बॉक्स’चा फोटो असून तो किती प्रमाणात जळाला आहे, हे माहिती आहे. त्यामुळे सरकारने आता थातूरमातूर अहवाल देऊन वेळ मारून नेऊ नये, तर सीबीआय तपासासाठी निश्चित वेळमर्यादा आखून द्यावी,” अशी मागणी राष्ट्रवादी काँग्रेस शरद पवार गटाचे आमदार रोहित पवार यांनी केली .
बंगालच्या राजकारणातील ‘चाणक्य’ म्हणून ओळख असलेले तृणमूल काँग्रेसचे ज्येष्ठ नेतेआणि माजी केंद्रीय रेल्वे राज्यमंत्री मुकुल रॉय यांचे सोमवारी पहाटे १.३० वाजता कोलकात्यातील एका खासगी रुग्णालयात दीर्घ आजाराने निधन झाले. ते ७१ वर्षांचे होते.मुकुल रॉय यांना डिमेन्शियासह इतर अनेक व्याधी होत्या, अशी माहिती समोर आली आहे.
अजितदादांनी आर्थिक तडजोड कधीही केली नाही. विकास आणि शिस्त याचा समतोल राखत त्यांनी काम केले. फडणवीस साहेबांच्या मार्गदर्शनाच्याखाली आणि एकनाथ शिंदे यांच्या साथीने दादांनी अर्थसंकल्पाची जोरदार तयारी केली होती. यावर्षीचा हा त्यांचा 12 वा अर्थसंकल्प ठरला असता, पण नियतीच्या मनात काहीतरी वेगळेच होते आणि आपल्याला ते सोडून गेले, अशा भावना उपमुख्यमंत्री सुनेत्रा पवार यांनी व्यक्त केल्या.