विशेष प्रतिनिधी
नवी दिल्ली : नॅशनल हेराल्डशी संबंधित कथित मनी लॉन्डरिंग प्रकरणात काँग्रेस नेत्या सोनिया गांधी, राहुल गांधी आणि इतरांविरोधात दाखल केलेल्या अंमलबजावणी संचालनालयाच्या (ED) आरोपपत्राची दखल घेण्यास नकार देणाऱ्या खालच्या न्यायालयाच्या आदेशाविरोधातील याचिकेवर दिल्ली उच्च न्यायालयात २० एप्रिल रोजी सुनावणी होणार आहे. National Herald Case
न्यायमूर्ती स्वर्णकांता शर्मा यांनी सोमवारी या प्रकरणाची सुनावणी पुढे ढकलत पुढील तारीख निश्चित केली. ईडीकडून अतिरिक्त सॉलिसिटर जनरल एस. व्ही. राजू यांनी न्यायालयाकडे लवकर सुनावणीची विनंती केली होती, त्यानंतर न्यायालयाने २० एप्रिल ही तारीख दिली.
यापूर्वी २२ डिसेंबर २०२५ रोजी उच्च न्यायालयाने या प्रकरणात सोनिया गांधी, राहुल गांधी तसेच सुमन दुबे, सॅम पित्रोदा, यंग इंडियन, डोटेक्स मर्चेंडाइज प्रा. लि. आणि सुनील भंडारी यांना नोटीस बजावली होती. तसेच खालच्या न्यायालयाच्या १६ डिसेंबर २०२५ च्या आदेशाला स्थगिती देण्याची ईडीची मागणीही न्यायालयासमोर आहे.
ईडीच्या मते, यंग इंडियन या कंपनीत गांधी कुटुंबाचा सुमारे ७६ टक्के हिस्सा असून या कंपनीने ९० कोटी रुपयांच्या कर्जाच्या बदल्यात असोसिएटेड जर्नल्स लिमिटेड (AJL) या कंपनीची मालमत्ता फसवणुकीने ताब्यात घेतली. एजेएल हीच कंपनी नॅशनल हेराल्ड हे वृत्तपत्र प्रकाशित करते.
खालच्या न्यायालयाने मात्र आपल्या आदेशात म्हटले होते की, प्रिव्हेन्शन ऑफ मनी लॉन्डरिंग अॅक्ट (PMLA) अंतर्गत कारवाई करण्यासाठी संबंधित मूळ गुन्ह्याबाबत एफआयआर आवश्यक आहे. या प्रकरणात तपास हा खासगी तक्रारीवर आधारित असल्याने ईडीचे आरोपपत्र कायद्याने ग्राह्य धरता येणार नाही, असे न्यायालयाने स्पष्ट केले होते.
दरम्यान, ईडीने उच्च न्यायालयात दावा केला आहे की खालच्या न्यायालयाने दिलेली कारणे कायद्याच्या दृष्टीने चुकीची आणि विसंगत आहेत. त्यामुळे या प्रकरणात कायदेशीर मुद्द्यांवर सविस्तर सुनावणी आवश्यक असल्याचे ईडीने न्यायालयाला सांगितले आहे.
Delhi High Court to Hear ED Plea Against Sonia and Rahul Gandhi in National Herald Case on April 20
महत्वाच्या बातम्या
- Devendra Fadanvis : राज्याची अर्थव्यवस्था 2047 पर्यंत 5 ट्रिलियन डॉलर्सवर नेणार; मुख्यमंत्र्यांचा विश्वास
- Kalakar Katta : गुडलक चौकातील ‘कलाकार कट्टा’ वादात नवे वळण; वाहतूक अडथळ्याची अधिकृत नोंदच नाही
- उद्योगपती अनिल अंबानीच्या संबंधित कंपनीवर 15 ठिकाणी ईडीचे छापेमारी
- साेशल मीडियावर व्हायरल वक्तव्य प्रकरणी वसंत माेरे यांच्यावर ॲट्रॉसिटी अंतर्गत गुन्हा
