विशेष प्रतिनिधी
नवी दिल्ली : नीट-यूजी पेपरफुटी प्रकरणातील कथित मुख्य सूत्रधार पी. व्ही. कुलकर्णी आणि रेणुकाई करिअर सेंटरचे संस्थापक शिवराज मोटेगावकर यांच्या न्यायालयीन कोठडीत राऊस एव्हेन्यू न्यायालयाने ११ जुलैपर्यंत वाढ केली आहे. NEET-UG Paper Leak
बुधवार, ८ जुलै रोजी जुन्या कोठडीची मुदत संपल्याने त्यांना विशेष सीबीआय न्यायाधीश अजय गुप्ता यांच्यासमोर हजर करण्यात आले होते. सीबीआयच्या सरकारी वकिलांनी कोठडी वाढवण्याची मागणी केली होती.
पी. व्ही. कुलकर्णी हा रसायनशास्त्राचा तज्ज्ञ असून तो सलग काही वर्षे नीटचा पेपर काढणाऱ्या समितीचा सदस्य होता. तसेच मोटेगावकर याने “आपल्या कोचिंग सेंटरच्या माध्यमातून प्रश्नपत्रिका आणि उत्तरे प्रसारित करण्यात महत्त्वाची भूमिका बजावली” असा सीबीआयचा आरोप आहे. मे महिन्यात ज्या वेळी मोटेगावकरला अटक करण्यात आली होती तेव्हा त्याच्या मोबाइलमध्ये ३ मे रोजीचा लीक झालेला पेपर सापडला होता.
नीट-यूजी 2024 प्रश्नपत्रिका फुटी प्रकरणाच्या तपासात केंद्रीय अन्वेषण विभागाने (सीबीआय) महत्त्वाचा खुलासा केला आहे. सीबीआयने दाखल केलेल्या आरोपपत्रात रसायनशास्त्राचे तज्ज्ञ पी. व्ही. कुलकर्णी आणि कोचिंग सेंटर चालक मोटेगावकर यांची भूमिका संशयास्पद असल्याचे नमूद केले आहे. प्रश्नपत्रिका तयार करणाऱ्या समितीशी संबंधित असलेल्या कुलकर्णी यांनी गोपनीय माहिती उपलब्ध करून देण्यास मदत केली, तर मोटेगावकरने आपल्या कोचिंग सेंटरच्या माध्यमातून लीक झालेली प्रश्नपत्रिका आणि तिची उत्तरे विद्यार्थ्यांपर्यंत पोहोचवण्यात महत्त्वाची भूमिका बजावल्याचा आरोप सीबीआयने केला आहे.
आरोपपत्रानुसार, पी. व्ही. कुलकर्णी हे रसायनशास्त्र विषयातील तज्ज्ञ असून ते सलग अनेक वर्षे नीट प्रश्नपत्रिका तयार करणाऱ्या समितीचे सदस्य होते. त्यामुळे त्यांना प्रश्नपत्रिका तयार करण्याच्या प्रक्रियेची तसेच गोपनीय माहितीची सखोल माहिती होती. या पार्श्वभूमीवर त्यांच्या भूमिकेचा सीबीआयकडून तपास करण्यात आला.
दुसरीकडे, मोटेगावकर हा आपल्या कोचिंग सेंटरच्या माध्यमातून प्रश्नपत्रिका आणि उत्तरपत्रिका इच्छुक विद्यार्थ्यांपर्यंत पोहोचवणारा महत्त्वाचा दुवा असल्याचा आरोप तपास यंत्रणेने केला आहे. विद्यार्थ्यांकडून मोठी रक्कम घेऊन प्रश्नपत्रिका उपलब्ध करून देण्यात आल्याचा संशयही तपासात व्यक्त करण्यात आला आहे.
सीबीआयच्या तपासातील सर्वात महत्त्वाचा पुरावा म्हणजे मोटेगावकरच्या मोबाईल फोनमधून जप्त करण्यात आलेली 3 मे 2024 रोजीची लीक झालेली नीट प्रश्नपत्रिका. हीच प्रश्नपत्रिका पुढील दिवशी झालेल्या परीक्षेत वापरण्यात आल्याचे तपासात समोर आले असून, त्यामुळे पेपर परीक्षा होण्यापूर्वीच बाहेर पडल्याचा संशय अधिक बळकट झाला आहे.
मे महिन्यात मोटेगावकरला अटक करण्यात आली होती. त्यानंतर त्याच्या मोबाईलची फॉरेन्सिक तपासणी करण्यात आली असता प्रश्नपत्रिका, उत्तरपत्रिका आणि इतर डिजिटल पुरावे हाती लागल्याचे सीबीआयने आरोपपत्रात नमूद केले आहे.
सीबीआयच्या मते, ही केवळ पेपरफुटीची घटना नसून त्यामागे संघटित रॅकेट कार्यरत होते. प्रश्नपत्रिका मिळवणे, ती विविध माध्यमांतून प्रसारित करणे, विद्यार्थ्यांना उत्तरे उपलब्ध करून देणे आणि त्याबदल्यात आर्थिक व्यवहार करणे, अशा संपूर्ण साखळीचा तपास सुरू आहे.
देशातील सर्वात मोठ्या वैद्यकीय प्रवेश परीक्षांपैकी एक असलेल्या नीट-यूजी परीक्षेच्या विश्वासार्हतेवर या प्रकरणामुळे गंभीर प्रश्नचिन्ह निर्माण झाले आहे. या प्रकरणाचा तपास अद्याप सुरू असून, आणखी काही आरोपींविरोधात पूरक आरोपपत्र दाखल होण्याची शक्यता सीबीआयने व्यक्त केली आहे.
NEET-UG Paper Leak: Custody of Accused Kulkarni and Motegaonkar Extended
महत्वाच्या बातम्या
